13 желтоқсанда Ш.Уәлиханов атындағы Жамбыл облыстық әмбебап ғылыми кітапханасында «Жазушымен бір күн» жобасы аясында ақын, сазгер Болатбек Әбішевтің шығармашылығына арналған «Өмір - дария, өмір - өлең» тақырыбында поэзия кеші өтті.

Кешке арнайы тұла бойына сөз өнерінің киесі қонып, сезім қылын шертер сазды әуеннің құдіреті дарыған ақынның замандастары Мойынқұм ауданының құрметті азаматтары Пернеш Қалыбаев, Болат Сатыбалдиев, Тұрсынбек Айдынбеков, «Әулие-Ата шайырлары» шығармашылық бірлестігінің бір топ ақындары Жорабек Әбдікерімов, Мұстафа Түлентаев, Алтай Байғожаев, Шахизад Акимов, Мұхит Есіркепов, Ерқадыр Жұмабаев, Асылхан Шүңіреков, Сенбай Алтын, Нақсұлу Ержігіт, Майра Жантлесова, Дәмегүл Бақытжанова және ақын ағамыздың қызы Айтгүл Әбішева қатысып, Болатбек Әбішев жайлы кеңінен шығармашылығына тән өзіндік қолтаңбасы жөнінде сөз қозғады.

Кеште Кенен Әзірбаев атындағы Жамбыл облыстық филормониясының әншісі Лаура Бексұлтанова, Мойынқұм аудандық мәдениет үйінің әншілері Қажымұрат Әбдіқадыров, Ерлан Айтқабыл, Мағжан Мәмбетәлиев ақынның әні мен сөзіне жазылған әндерді шырқаса, кітапхана қызметкерлері ақын өлеңдерін оқырман қауымға жеткізді.